Jab huaa irfaaN tou gham aaraam-e-jaaN bantaa gayaa
soaz-e-jaanaN dil mein soaz-e-deegaraaN bantaa gayaa
rafta rafta munqalib hoti gayi rasm-e-chaman
dheere dheere naghma-e-dil bhi fughaaN bantaa gayaa
mein tou jab manooN key bhar dey saaghar-e-har khaas-o-aam
yooN tou jou aayaa wohi peer-e-mughaaN bantaa gayaa
mein akela hi chalaa thaa jaanib-e-manzil magar
loag saath aatey gaye aur karvaaN bantaa gayaa
jis taraf bhi chal paRey hum aabla paayaan-e-shouq
khaar sey gul aur gul sey gulistaaN bantaa gayaa
sharah-e-gham tou mukhtasir hoti gayi unn key huzoor
lafz jou munh sey naa niklaa dastaaN bantaa gayaa
dehr mein majrooh koi jaavedaaN mazmuN kahaaN
mein jisey choota gayaa woh jaavedaaN bantaa gayaa
Poet: Majrooh sultanpuri
