maut ik geet raat gaatii thii
zindagii jhuum-jhuum jaatii thii
kabhii diivaane ro bhii partay thay
kabhii terii bhii yaad aatii thii
kis ke maatam mein chaaNd taaron say
raat bazm-e-azaa sajaatii thii
rote jaate the tere hijr nasiib
raat furqat kii Dhalatii jaatii thii
khoii khoii sii rehtii thii vo aaNkh
dil kaa har bhed paa bhii jaatii thii
zikr thaa rang-o-buu kaa aur dil me.n
terii tasviir utaratii jaatii thii
husn mein thii in aaNsuuon kii chamak
zindagii jin mein muskuraatii thii
dard-e-hastii chamak uThaa jis mein
vo ham ahal-e-vafaa kii chhaatii thii
tere un aaNsuuon kii yaad aaii
zindagii jin mein muskuraatii thii
thaa sukuut-e-fazaa tarannum-rez
buu-e-gesuu-e-yaar gaatii thii
Gam-e-jaanaaN ho yaaN Gam-e-dauraaN
lau sii kuchh dil mein jhil-milaatii thii
zindagii ko vafaa kii raahon mein
maut Khud raushanii dikhaatii thii
baat kyaa thii ki dekhate hii tujhe
ulfat-e-ziist bhuul jaatii thii
the na afalaak gosh bar aavaaz
beKhudii daastaaN sunaatii thii
karavaTein le ufaq pe jaise subah
ko_ii doshizaa ras-masaatii thii
zindagii zindagii ko vaqt-e-safar
kaaravaaN-kaaravaaN chhupaatii thii
saamane tere jaise koii baat
yaad aa-aa ke bhuul jaatii thii
vo teraa Gam ho yaa Gam-e-duniyaa
shamma-sii dil mein jhil-milaatii thii
Gam kii vo daastaan-e-niim-shabii
aasmaanon koo neend aatii thii
maut bhii gosh bhar sadaa thii “Firaq”
zindagii ko_ii giit gaatii thii
