WataN ki mitti pukarti hai
Hawa-e-sarhad hamarey shehrooN ki taraf aayi to us key hoontooN pe yeh nawaa thi
MujahidooN ko naveed puhnchey
keh aazaish ki gharhi key woh muntazir they -Woh aa gayi hai
sadaa watan ki her eik sarhad pe goonjti hai
Uthoo keh tum ko watan ki mitti pukarti hai!
Her eik lab pe yehi sadaa thi
watan bulaye to sochney ka kya mukaam hai?
Chaloo keh sarhad pe apney khooN sey likheeN shajaat ki dastaaneeN
chaloo keh fani ko ghair-fani meiN dhaalney ka kamal janeeN
HameeN watan ki ghulaab mitti eik zarra tamaam duniya key mal-o-zar sey azeeztar hai!
is eik zarrey meiN aath sadiyooN ki dastaneeN likhi hui haiN
yeh dastaneeN hamarey her ik qartey meiN moujzan haiN
Uthoo keh mazi ki dastanooN ko apney tazaa lahoo se saincheeN
keh aaney waley dinooN ki faslooN key beej booney ka waqt aya
Jo aaj boeeN gey kal ussi ko katna hai
keh jo bhi lamha guzar raha hai
Woh aagey guzrey charagh lamhooN our aaney waley faragh lamhooN meiN rabta hai!
Pukartey haiN darooN, dareechooN sey aabroo ke bahar mousam
ghulaab booney ki ruut naheen hai keh hum ko apney
gharooN meiN khiltey ghulaab bachooN ko palna hai
keh maooN, behnooN key phool chehrey our masoom betiooN ke
labooN pe khiltey howey shagofooN sarhadooN ki taraf barhti hui
seyaa hawaooN key taiz lamhooN ki zad meiN aaney sey rokna hai
sarooN ko hath meiN ley ke nikloo
keh aaney waley dinooN meiN izzat our aabroo ka nishaaN yehi hai
Watan ki mitti hamari maaN ka sufaid aanchal hai
jis ki hurmat hamari hasti se moutbir hai
Watan ke rastey meiN jo supar ho, woh seena hum ko azeez-tar hai
jahan pe manzil hai aabroo ki wahiN hamari bhi rahguzar hai
khum-e-shahadat meiN aab-e-hewaaN chhalak raha hai
hameeN khabar hai!
Pukarti hai zameeN ki sarhad
Azeem hai jo wafaa ki manzil, azeem-tar haiN woh paooN jin ko
sadaa watan ki hamarey daman meiN ley key aayi
Azeem-tar he woh sabz khwahish
jo shouq-e-rishtoon ki istewari ki surkh mitti sey phootti hai
Azeem-tar hai woh saans jis ki azeez dori
Watan ke rastey meiN tootti hai
Amjad Islam Amjad
I hope we all take a moment to remember this historical date and its significance to our present. Please contribute your own selections. Thanks. Happy March 23rd.
