**
Aankhon ka rang, baat ka lehja badal gaya
woh shakhs aik shaam main kitna badal gaya
kuch din to mera aks raha aieenay main naqsh
phir yoon huwa kay khud mera chehra badal gaya
jab apnay apnay haal pay ham tum na reh sakay
to kiya huwaa jo ham say zamana badal gaya
kadmoon talay jo ret bichi thi woh chal pari
us nay churhaaya haath to sehra badal gaya
koi bhi cheez apni jagaah par nahin rahi
jaatay hi aik shakhs kay kiya kiya badal gaya
aik sarghoshi ki mauj nay kaisay kiya kamal
wo bay niyaaz saara ka saara badal gaya
uth kar chala gaya koi wakfay kay darmiyaan
parda utha to saara tamaasha badal gaya
hairat say saaray lafz usay dekhtay rahay
baaton main apni baat ko kaisay badal gaya
kehnay ko aik sehan main deewar hi bani
ghar ki fiza makaan ka naqsha hi badal gaya
shaayad wafa kay khel main uktaa gaya tha woh
Manzil kay paas akay jo rasta badal gaya
qayem kisi bhi haal pay duniyaa nahin rahi
tabeer kho gayee kabhi sapna badal gaya
manzar ka rang asal main saaya tha rang ka
jis nay usay jidhar say bhi dekha badal gaya
andar kay mausumoon ki khabar us ko ho gayee
us no bahaar naaz ka chehra badal gaya
aankhon main jitnay ashk thay jugnoo say ban gaye
woh muskuraaya aur meri duniyaa badal gaya
apni gali main apna hi ghar dhoondtay hain logh
nah janay kon shehar ka naqsha badal gaya …!!
**
