Kaifi Azmi wrote this poem for homeless labours/construction workers.
Aaj ki raat bohat garam hawaa chalti hai
aaj ki raat naa foot path pey neend aaye gi
sab utho, mein bhi uthoon, tum bhi utho, tum bhi utho
koi khirki isi deewaar mein khul jaaye gi
yeh zameen tab bhi nigal lainey pey aamaadah thi
paon jab toot-ti shaakhoun sey utaarey hum ney
inn makaanoun kou khabar hai naa makeenoun ko khabar
unn dinoun ki jou guphaaoun mein guzaarey hum ney
haath dhaltey gaye saanchey mein tou thaktey kasiey
naqsh key baad naye naqsh nikhaarey hum ney
ki yeh deewar buland, aur buland, aur buland
baam-o-dar aur, zaraa aur sanwaarey hum ney
aandhiyan torr liya karti thein shamoun ki louein
jarr diye iss liye bijli key sitaarey hum ney
ban gaya qasr tou pehray pey koi baith gayaa
sou rahey khaak pey hum shorish-e-ta’ameer liye
apni nas nas mein liye mehnat-e-paiham ki thakan
band aankhoun mein usi qasr ki tasweer liye
din pighaltaa hai isi tarhan saroun par ab tak
raat aankhoun mein khatakti hai syaa teer liye..
…