wo aik lamha
hazaaroN saal ka wo aik lamha
jab usski aankh se aNsoo rawaN thay
har ansoo miaN hazaroN ghum jawaN thay
meray dil ki faqat bus aik hasrat
laraztay hoNt uskay kuch tau bolaiN
taRaptay dil ke uske raaz kholaiN
wo uski har nazar maiN aik hasrat
ke uske dil ke ghum, pal ko tau so laiN
un ankhoN maiN andhaira cha raha tha
har ansoo dil mera taRpa raha tha
mujhay haiN yaad wo din bhi ke jub wo
hazaroN rang ankhoN maiN samaye
haseeN chehray ko baloN maiN chupaye
hawa ke mast jhoNke jaisi chalti
laboN ki surkhiyoN se sabha jalti
isharay se ussi ke sham dhalti
gulabi phool jaisay gaaloN par ab
khazaN ne apni zardi hai lagai
wo sookhay hooNt unmaiN chup ki jumbish
mujhay malooM tha kehna wo chahay
ke wo meri thee aur meri rahay gi
wo uski akhri koshish ke keh day
ke meray wastay har ghum sahe gi
magar ab sans uski tham chuki thee
laraztay hooNt uske ab thay sakit
magar kya maiN bhi usko chahta tha?
meray rafeeq mujhay daad detay jatay haiN
maiN apnay dard ki tash'heer kar gaya shayad
maiN usko chah sakoN ye meri besaat kahaN?
maiN usko soch sakoN ye baRi ghaneemat hai.