Gul-e-umeed ki tehni ki paishaani sey
qismat ke sitaarey ki tarah toottey
aey aakhri patey….
mujhey tum ko tumhaari mout ka parsa
bhari aankhoN sey dena hey
magar, ik dard mera bhi….
agar tum sun sako tou….?
aik lamhay ko suno…
tumhaara bhi safar uss simt hey ab sey
jahaaN sey waapsi mumkin nahi hoti
jahaaN jashn-e-chiraaghaaN
jashn-e-khushboo ho…
khizaaN mosam ke nohey hoN
ya maatam ho
sakooN meiN farq bilkul bhi nahi aata…
Suno………..?
iss neend nagri meiN
merey pyarey bhi sotey heiN
unheiN kehna…
meiN thakan sey choor hooN bilkul
mujhey khamoshiyaaN ab raas aati heiN
meri aankhoN ki jheeleiN khushk heiN kab sey
faqat ab hasratoN ki kankareiN……….
palkoN meiN chubhati heiN…….
meri saanseiN ,merey dil sey ulajhti heiN
mujhey ab jaagna ,be-khawab rehna
dard deta hey……
maiN har chehrey ko takti hooN
kisi ki aankh meiN
ab aks …..mera ruk nahi paata
bharey aakaash par merey liye
koi sitaara ab nahi roshan
nazar thak kar zameeN ki Or takti hey
unheiN kehna ke…
meiN un ke bina ab buhat tanha hooN
agar jo ho sakey tou
iss shahr-e-panaah ki sar-zameeN, ki mehrbaaN
baahoN meiN thori si panaah merey liye
un sey jo ban paaey….
tou meiN bhi neend nagri meiN chali aaouN
meri dukhti huwi aankhoN ko
be-khawaabi ke ZindaaN sey rihaai ho
maiN gehri neend so jaaoN
Re: maiN gehri neend so jaaoN…!
Wah … :k:
Bahut umdaah nazam hai … !
Re: maiN gehri neend so jaaoN…!
meri dukhti huwi aankhoN ko
be-khawaabi ke ZindaaN sey rihaai ho
maiN gehri neend so jaaoN
Bohat Khoob GuL-e-Tasbeeh..
Re: maiN gehri neend so jaaoN....!
long but achi hai :)
Re: maiN gehri neend so jaaoN....!
kaafi achi hai.
Re: maiN gehri neend so jaaoN…!
meri halat pe to ye nazm pori utarti hai 
boht aala :k:
thank for sharing Gul e tasbeeh 
Re: maiN gehri neend so jaaoN…!
wah bohat khoob :k:
Re: maiN gehri neend so jaaoN…!
pehle kuch khana paka ke rakho phir kuch or karna 
iti sad poem 
Re: maiN gehri neend so jaaoN…!
Kaafi lambi hey, lekin khoobsoorat nazm hey :k: