Khabar ae tahayyur-e-ishq sun na junuuN rahaa na parii rahii
na to tuu rahaa na to main rahaa, jo rahii so beKhabarii rahii
shaah-e-beKhudii ne ataa kiyaa mujhe ab libaas-e-barahanagii
na Khirad ki bakhiyaagarii rahii na junuuN ki pardaadarii rahii
chalii simt-e-ghaib se ik havaa ke chaman zahuur kaa jal gayaa
magar ek shaaKh-e-nihaal-e-Gham jise dil kahein so harii rahii
nazar-e-taghaaful-e-yaar kaa gilaa kis zabaaN se bayaaN karuuN
ke sharaab-e-sad-qadaah aarazuu Khum-e-dil mein thii so bharii rahii
vo ajab gharDii thii main jis gharDii liyaa dars-e-nusKhaa-e-ishq kaa
jo kitaab-e-aql thi taaq per so wo wahin dharii thii dharii rahii
tere josh-e-hairat-e-husn kaa asar is qadar tau yahaaN huaa
ke na aa-iine mein rahii jilaa, na parii ki jalvaa-garii rahii
kiyaa rakh aatish-e-ishq ne dil-e-benavaa-e-“Siraj” ko
na Khatar raha na hazar raha, jo raha so beKhatarii rahii
(Siraj Aurangabadi)