WOH bohat door say aaya tha,
kisi anjaan nagar say…
us k paas kuch sunehray alfaaz thay uski qul kayinaat, qul asaasa
rung barangey baadloun jaisey, titli k paroun jaisey alfaaz
hur lafz apnay andar mainey ka jaahaan liyey huay tha
mufahameem ki lughat seenay main chupayey
lakin, us k lafzoun main lahu ki mehak sub say numayaan thi
magar yeh lahu uska apna nahin kisi or ka tha
Woh mujh say mila to chounk utha
lagta hay tum say pehlay bhi mulaqaat ho chuki hay
uski aankhain goya theen
meri aankhoun ki zubaan kushk pat’toun jaisi hogayi
tub us nay apnay lafzoun k khazaaney main say aik lafz bahar nikaala
or mujh ko soanp dia
main nay juldi say palkoun ki jhaalar main us lafz ka sitaara atkalia
Jaantey ho woh lafz kia tha??
Woh lafz tha…Muhabbat,
mujhay woh lafz day kar apni dunya main laut gaya
palat kar daikha bhi nahin
or main rastey main thuk kar so gayi
suno, …
Log rastey main thuk haar kar soo jaaney waalon ko pagal kyun kehtay hain~ ?