Kal hamesha ki tarhan us ne kaha yeh phone per
Main bohat masroof hoon, mujh ko bohat se kaam hain
Is liye tum aao milney main to aa sakti nahin
Her riwayat tor kar is baar main ne keh diya
Tum jo ho masroof to main bhi bohat masroof hoon
Tum jo ho mashoor to main bhi bohat maroof hoon
Tum agar ghamgeen ho to main bhi bohat ranjoor hoon
Tum thakan se choor ho to main bhi thakan se choor hoon
Jaan-e-mann! hai waqt mer bhi bohat hi qeemti
Kuch puraney doston ne milney aana hai abhi
Main bhi ab farig nahin, mujh ko lakhon kaam hain
Warna kehney ko to sab lamhey tumharey naam hain
Meri aankhein bhi bohat bojhal hain, sona hai mujhe
Ratjagon ke baad ab neendon main khona hai mujhe
Main lahoo apni aana-on ka baha sakta nahin
Tum nahin aatein to milney main bhi aa sakta nahin
Us ko yeh keh kar Wassi main ne Receiver rakh diya
Aur phir apni anaa ke paoon per sir rakh diya
Wassi Shah