kuchh bhii nahii.n hai baaqii baazaar chal rahaa hai
ye kaarobaar-e-duniyaa bekaar chal rahaa hai
vo jo zamii.n pe kab se ik paa.nv par kha.Daa thaa
sunte hai.n aasmaa.n ke us paar chal rahaa hai
kuchh muzmahil saa mai.n bhii rahtaa huu.n apne andar
vo bhii bahut dino.n se biimaar chal rahaa hai
shoriidgii hamaarii aise to kam na hogii
dekho vo ho ke kitnaa tayyaar chal rahaa hai
tum aa.o to kuchh us kii miTTii idhar udhar ho
ab tak to dil kaa rasta hamvaar chal rahaa hai