Aik Nazm, Jo Mujhe Lagta Hai Pehlay Bhi Share Ho Chuki Hai Magar Main Share Ker Raha Hoon..
Kuch Bhi To Nahin Wesa
Jesa Tujhe Socha Tha
Jitna Tujhe Chaha Tha
Socha Tha Teray Lab Per
Kuch Harf Dua’on Ke
Kuch Phool Wafa’on Ke
Mehkain Ge Meri Khatir
Kuch Bhi To Nahin Wesa
Jesa Tujhe Socha Tha
Mehsoos Yeh Hota Hai
Dukh Jhelay Thay Jo Ab Tak
Be’naam Musaafat Main
Likhnay Ki Mohabbat Main
Parhnay Ki Zaroorat Main
Be’sood Riazat Thi
Be’faiz Ibaadat Thi
Jo Khawaab Bhi Dekhay Thay
Inn Jaagti Aankho’n Ne
Sab Khaam Khayali Thi
Phir Bhi Tujhe Paanay Ki
Dil Ke Kisi Goshay Main
Khuahish To Bacha Li Thi
Lekin Tujhe Pa Ker Bhi
Aur Khud Ko Ganwa Ker Bhi
Iss Habs Ke Mausam Ki
Khirki Se Hawa Aai
Na Phool Se Khushbo Ki
Koi Bhi Sada Aai
Abb Neend Hai Aankho’n Main
Na Dil Main Wo Pehli Si
Taaza Sukhan Aara’i
Na Lafz Meray Niklay
Na Harf-o-Ma’ani Ki
Danish Meray Kaam Aai
Na’deeda Rafaaqat Main
Jitni Bhi Azee’yat Thi
Sab Meray He Naam Aai
Kuch Bhi To Nahin Wesa
Jesa Tujhe Socha Tha
Jitna Tujhe Chaha Tha
