koii baat abhii huii hai k guzar gaye zamaane...my Dad's Ghazal

Arts & Culture Poetry ( Intikhaab & Sho'ra-e-Gupshup)
1

**salaam dosto,

aaj maiN apne vaalid e moHtaram janaab e marHoom janaab e Ali Z. Usmanii saaHib ke she’rii majmoo’a** “motiyaaN” **se ek Ghair muraddaf Ghazal le kar aapkii Khidmat meN vaarid huaa huN. ummeed hai aapko pasand aayegii. aapkii aaraa kaa shiddat se intezaar rahegaa. shukria.

to, Ghazal mulaaHizah farmaaiye:**

**1.
koii baat abhii huii hai k guzar gaye zamaane
vohii merii Khud_farebii, vohii aapke bahaane

yeh palak se chaand hii tak haiN sunehre taar tere
tu kise sunaa rahii hai merii chash-e-tar taraane

mire waaqi’aat ab tak haiN usii taraH ke saare
k suno to ik Haqeeqat, na suno to sab fasaane

mujhe hogaa koii dhokaa, na tumheN maza milegaa
mire dil ko ab na chheRo kisii cheez ke bahaane

tu yahaaN nahiiN yeh sach hai, maiN yehiiN huuN yeh bhii sach hai
mire dil ke faisle ko merii aaNkh bhii to maane!

tiraa Husn-e-be-niyaazii hai bahot qareeb mujh se
nahiiN door ab k yeh dil tiraa dard bhii na jaane

yeh nigaah door tak thii k chaman pe barq chamkii
isii raushnii meN mujhko nazar aaye aashiyaane

terii raHmatoN ke sadqe, mirii zeHmateN haiN tujh se
mujhe dekh le jo pahle to gunaah_gaar jaane

Khowaandagii ke liye shukr guzaar hai banda-e-naa_cheez :slight_smile:

Allah Haafiz,

faqat Khaak-e-paa,
_______Hashmat**

2

Re: koii baat abhii huii hai k guzar gaye zamaane…my Dad’s Ghazal

mire waaqi’aat ab tak haiN usii taraH ke saare
k suno to ik Haqeeqat, na suno to sab fasaane

mujhe hogaa koii dhokaa, na tumheN maza milegaa
mire dil ko ab na chheRo kisii cheez ke bahaane

Wow :k: impressive :slight_smile:

3

Re: koii baat abhii huii hai k guzar gaye zamaane…my Dad’s Ghazal

wah bohat khoob :k:

4

Re: koii baat abhii huii hai k guzar gaye zamaane…my Dad’s Ghazal

Kaya collection hai KKF Nice :k:

5

Re: koii baat abhii huii hai k guzar gaye zamaane…my Dad’s Ghazal

Khalil bhai kya kamaal ki ghazal hey ye. Aek aek sheir apni jaga bazaat-e-khud aek ghazal hey :lajawab: … Kuch aashaar to bohat ziaada achey lagey wo quote keeye heiN, lekin tamaam ghazal hi shaandar hey. Ye ghazal hamaarey saath share karne ke leeye be’had shukriya :slight_smile: Aur haaN, agli qist ka shiddat sey intizaar rahey ga :slight_smile:

6

Re: koii baat abhii huii hai k guzar gaye zamaane...my Dad's Ghazal

wesay tu saRi gazal khubsurat hai lakin this 1 is really beautiful
tu yahaaN nahiiN yeh sach hai, maiN yehiiN huuN yeh bhii sach hai
mire dil ke faisle ko merii aaNkh bhii to maane!

Fakhta acha bolta hai :p

7

Re: koii baat abhii huii hai k guzar gaye zamaane...my Dad's Ghazal

buhut khoob ji :)

8

Re: koii baat abhii huii hai k guzar gaye zamaane...my Dad's Ghazal

Buhat Umda Ghazal hai ,thanks for sharing :-)

9

Re: koii baat abhii huii hai k guzar gaye zamaane…my Dad’s Ghazal

aapkaa beHad mamnoon o mutashakkir huN k aapne vaalid marHoom kii Ghazal pasand farmaayii…:slight_smile:

shukria bahot bahot aapkaa Shab-e-Hijr saaHiba :slight_smile:

bahooot navaazish haia aapkii UZ saaHiba :slight_smile:

Amal Bhaaii, aapkii is qadar pazeeraaii ke liye maiN aapkaa shukr guzaar huN…inshaa Allah, maiN waqtan fa waqtan vaalid marHoom ke kalaam ko aap logoN ke saath share kartaa rahuuNgaa… Khush rahiye :slight_smile:

**Koyal aapkaa bahot bahot shukria k aapko Ghazal pasand aayii aur bil-Khusoos mandarja baalaa she’r. navaazish, karam!

meraa kalaam nahiiN hai yeh so FaaKhta bas likhtaa hai boltaa nahiiN hehe** :smiley:

bahot abhot shukria aapkaa janaab :slight_smile:

G-e-T, aapkaa beHad shukria, navaazish aur karam k aapko kalaam pasand aayaa :slight_smile:

10

Re: koii baat abhii huii hai k guzar gaye zamaane...my Dad's Ghazal

Bahut umdaah Khalil bhai, Allah Pak aap ke walid-e-marhoom ki magfirat farmaye, Aameen !

11

Re: koii baat abhii huii hai k guzar gaye zamaane...my Dad's Ghazal


du'aaoN ke liye bahot bahot shukria Arif Bhai aur kalaam kii pasandeedgii ke liye bhii mamnoon o mutashakkir huN :) Khush rahiye

12

Re: koii baat abhii huii hai k guzar gaye zamaane...my Dad's Ghazal

v nice.