Kitaabein jhaankti hein
band almaari key sheeshoun sey
bari hasrat sey takti hein
maheenon ab mulaaqaatein nahin hotein
jou shaamein unn ki sohbat mein kataa karti thein
ab aksar guzar jaati hein
computer key pardoun par
bari be-chaen rahti hein kitaabein
unhein ab neend mein chalney ki aadat hou gayi hai
bari hasrat sey takti hein
jou qadrein woh sunaati thein
key jin key cell kabhi marety nahin thay
woh qadrein ab nazar aati nahin ghar mein
jou rishtey woh sunaati thein
woh saarey udhrey udhrey hein
koi safha palt-taa hoon tou ik siski nikalti hai
kai lafzoun key ma’ani gir parey hein
binaa pattoun key sookhey tund lagtey hein woh sab alfaaz
jin par ab koi ma’ani nahin ugtey
zubaan par zaaiqa aataa thaa jou safha palatney kaa
ab ungli click karney sey bas ik jhapki guzarti hai
bohat kuch tah-ba-tah khultaa chalaa jaataa hai pardey par
kitaaboun sey jou zaati raabta thaa woh kat gayaa hai
kabhi seenay par rakh kar lait jaatey thay
kabhi ghutnoun kou apney rahal ki soorat banaa kar
neem sajdey mein parhaa kartey thay, chootey thay jabeen sey
woh saara ilm tou miltaa rahey gaa aaindaa bhi
magar woh jou kitaaboun mein milaa karety thay sookhey phool
kitaabein maangney, girney, uthaaney key bahaaney rishtay banaa kartey thay
unn kaa kiyaa hou gaa
woh shayad ab nahin houn gai…
