Aik Ghazal,
Aalam-e-Hijr Main Soya Hoon, Na Sona Chahu’n
Main Teri Zaat Se Mayoos Na Hona Chahu’n
Gul Teray Dil Main Khulain Aur Mehek Jaun Main
Issi Rishtay Main Her Insaa’n Ko Pirona Chahu’n
Kion Gawara Ho Teray Dard Main Bhi Shirkat-e-Ghair
Tu Jo Yaad Aye To Tanhai Main Rona Chahu’n
Justuju Ke Leay Rehta Hai Bahana Darkaar
Kho Ke Paaya Jisay, Pa Ker Usay Khona Chahu’n
Chha Raha Hai Meray Ander Gham-e-Anjaam Ka Abrr
Khush Bhi Hota Hoon To Aankhon Ko Bhigona Chahu’n
Main Hoon Ik Tarfa Bhikari, Koi Meri Bhi Suno
Raat Ke Farsh Pe Kirno’n Ka Bichhona Chahu’n
Yuun To Ik Phool Ki Patti Se Behel Jaata Hoon
Main Machal Jaun To Sehra Ka Khilona Chahu’n
Mera Mansab Nahi Peghambar-e-Fun Ban’nay Ka
Main To Ehsaas Ko Lafzo’n Main Samona Chahu’n
Iss Zamanay Ka Ajab Tarz-e-Tasawwuf Hai Nadeem
Ke Main Qatray Main Samander Ko Dibona Chahu’n
(Ahmed Nadeem Qasmi)
