Khuda-e-Bartar Teri zameen per, zameen ki khatir, yeh jang kyun hai?
Her ek fatah-o-zafar k daman pay khoon-e-insan ka rang kyun hai?
Zameeb bhi Teri hai, hain hum bhi Teray, yeh malkiyat ka sawal kya hai?
Yeh qatal-o-khoon k rivaaj kyun hai? yeh rasm-o- jang-o-jadal kya hai?
Jinhein talab hai jahaan bhar ki unhi ka dil itna tang kyun hai?
Khuda-e-Bartar Teri zameen per, zameen ki khatir, yeh jang kyun hai?
Ghareeb maa’on, shareef behnon ko aman-o-izzat ki zindagi de,
Jinhein ataa ki hai Tu ne taqat, unhein hidayat ki roshni de,
Saron mein Kibr-o-ghuroor kyun hai? Dilon k sheeshon pay zang kyun hai?
Khuda-e-Bartar Teri zameen per, zameen ki khatir, yeh jang kyun hai?
Qazaa k rastay pay janay walon ko, bach k anay ki raah dena,
Dilon k gulshan ujar na jayen, muhabbaton ko panaah dena,
Jahan mein jashn-e-wafa k badle yeh jashn-e-teer-o-tufang kyun hai?
Khuda-e-Bartar Teri zameen per, zameen ki khatir, yeh jang kyun hai?
Sahir Ludhianvi