Khuaab bhi ik musafir ki tarah hotey haiN
Rang ki mooj maiN khushboo k aser maiN rehna
Inn ki aadut hi nahiN
Aik jagah per rukna
Inn ki qismat hi nahiN
Aik nagar maiN rehna
Hum bhi aik khuaab haiN ay jaaN! teri aankhooN maiN
Saaya-e-abar e tawajah k gumaan maiN rehna
Inn k taaq se Hum ko na hatana jab tak
Raat k baam per taarooN k diyey Jaltey raheiN
Daikhna hum ko humaiN daikhtey jana jab tak
Hum teri aankh ki waadi maiN safar kertay raheiN
Khuaab ka shooq ye hi, khuaab ki qismat bhi ye hi
Hulqa-e-raig-e-rawaaN gard-e-safar maiN rehna
Rang ki mooj maiN, khusboo k safar maiN rehna
Hum magr khuaab haiN kuch aur tarah k hum ko
Na koi shooq-e-safar hai na talaash-e-khushboo
Teri aankhooN maiN julaieN aur inn hi maiN bujh jaaieN
Chasm dar chasm nahiN hum ko safar maiN rehna
Hum ko hai teri nazar maiN rehna…
–Amjad Islam Amjad