Main aaina tha, woh mera khayaal rakhti thi
Main toot-ta tha tau chun kar sanmbhal rakhti thi
Harr ek masley ka hal nikaal rakhti thi
Zaheen thi, mujhe hairat mein daal rakhti thi
Main jab bhi tark-e-talluq ki baat karta tha
woh rokti thi mujhe, kal pe taal rakhti thi
Woh mere dard ko chunnti thi apni palkon se
Woh mere wastey khud ko nidhaal rakhti thi
Woh doobney nahi deti thi dukh ke darya mein
Mere wajood ki naaow uchaal rakhti thi
Duaaein uss ki, balaaon ko roak laiti thin
Woh mere chaar soo hathon ki dhaal rakhti thi
Ik aisi dhunn ke nahi phir kabhi main ne suni
Woh munfarid sa hansi mein kamaal rakhti thi
Ussey nadamatain meri kahan gawaara thin
Woh mere wastey aasaan sawaal rakhti thi
Bichar ke uss se main dunya ki thokaron mein hoon
Woh pass thi tau mujhe lazawaal rakhti thi
Sehar tha naam , ujaalay ghulam they uss ke
Woh zindagi ke andhairey ujaal rakhti thi
Woh muntazir meri rehti thi dhoop mein shayed
Main laut-ta tha tau chaaon nikaal rakhti thi
Ye mien ne Gusphup per hi pari thi kafi der pehle
pata nahi kis ne likhi hai aur kis ne post ki thi
