**
kauN aaya! raaste aainaa khaane ho gae
raat raushaN ho gayi din bhi suhaane ho gae
kyoN haveli ke ujaRne ka mujhe afasos ho
saikRoN be-ghar parindoN ke Thikaane ho gae
ye bhi mumkin hai ke us ne mujh ko pahchana na ho
ab use dekhe hue kitne zamaane ho gae
jaao un kamroN ke aaine uthaakar phaink do
vo agar ye kah raheN ho ham puraane ho gae
meri palakoN par ye aansoo pyaar ki tauheeN haiN
un ki aankhoN se gire motii ke daane ho gae
**