[thumb=H]sun27m17759_7440009.JPG[/thumb]
Ab tu har samay aankh purnam hai
Ek tassalsul hai siskeyoon ka rag-e-jaan mein
Aur us par neend bhi kam hai
Mujhe tanha rehne diya hota
Na kuch kaha hota na kuch suna hota
Mein sitaroon ko dekhti tu sochti
Ke kitne sundar hain chirag roshneyoon ke
Jugnu hain bhatkay huwe jaise basteyoon ke
Ab tu sitaroon ke maaeni hain badal rahay
Ek khayal ke samundar mein jaisay
Tair kanwal rahay hain
Ab tu dekh kar un ko sochti hoon mein
Us ka milan bhi hai
Ya is hasti mein dooreyoon ki jalan hi hai
Gar tu ne mujhe tanha rehne diya hota
Tu chand ko dekh kar mein yeh sochti
Ke kya aaj bhi buriya charkha kaati rahi hai
Kya kabhi is mein koi sachi baat rahi hai
Magar ab tu chaand dekh kar khayal tumhara ata hai
Chaand ke aaenay mein ek aks pyara aata hai
Gar mein tanha hoti
Tu suraj dhalnay ki saa’atton mein
Mein ne yeh socha hota
Ke kirnoon ki dosti sood per thee ya zeyaan per
Abhi aur kitna khwaab hain jahaan per
Magar ab tu doobtay suraj ke sath jaisay
Dil bhi doob jata hai mera
Tanha hoti gar jo mein
Thandi meethi subhoon mein umeed-e-fasl-e-gul hoti
Shabnami khwahishoon mein
titleyoon, parwa’on ki hulchul hoti
Magar ab tu jaisay koi toofan pehlay se hai
Mojaza hota hai palkoo se paray
Khultay he chasham beena
Tip tip barasnay lagta hai
Aur subha ki be-mehri ka nasha
Rag-o-pay mein utarnay lagta hai
Mujhe tanha rehne diya hota tu
Koi lamha kamzoor na hota
Koi jazba moun zor na hota
Jis raah per qadam partay
Wohi manzil ka raasta hota
Kaash
Kaash tum ne
Mujhe tanha rehne diya hota …
(Uzma Rana)
