**kuch khushi ke saaye main aur kuch ghamon key sath sath
zindgii kat hii gaii hai uljhanon ke sath sath
aaj tak us kii thakan se dukh raha hai yeh badan
ik safar main ne kiya tha khwaahishon ke sath sath
kis trah khaya hai dhoka kya bataon main tumhien
doston ke mashwarey they saazishon ke sath sath
is dafa sawan mein teri yaad ke badal rahey
is dafa main khoob roya barishon ke sath sath
kash phir se lout aaien phir wohii bachpan ke din
bhagna phoolon kii khatir titliyon ke sath sath
shehar mein kuch log meray chahney waaley bhi hain
phool mujh ko lag rahey hain pathron ke sath sath
**