Kabhi mujh ko saath le kar, kabhi mere saath chal ke
woh badal gaya achanak meri zindagi badal ke
huye jis pe meherban tum koi khushnaseeb ho ga
meri hasratein to niklin mere aansoun main dhal ke
teri zulf-o-rukh ke qurban dil-e-zaar dhoondta hai
wohi shaam ke ujale woh hi surmai dhundhalke
koi phool ban gaya hai koi chaand koi taaraa
jo chiragh bujh gaya hai teri anjuman main jal ke
mere doston khudara mere saath tum bhi dhoondo
woh yahin kahin chupa hai mere gham ka rukh badal ke
teri be jhijhak hansi se na kisi ka dil ho mela
ye sheher hai aenon ka yahan saans le sanbhal ke