aadaab, dosto!
ek haaliyah koshish pesh-e-Khidmat hai. ye Ghazal Ahamad Nadeem Qasmi ke ek misre par mabnii hai. ummeed hai aap pasand farmaayeNge. apnii raae se navaaziyegaa.
**Ghazal
kab tak imroz meN andesha-e-fardaa kartaa?
mar gayaa, maiN baRaa aajiz thaa, bhalaa kyaa kartaa
terii dunyaa meN haqeeqat to kahiiN thii hii nahiiN
vahm-o-aasaar pe kab tak maiN guzaaraa kartaa!
ek saaye ke ta.aaqub meN huii umr tamaam
kaash, bhuule se na maiN Khvaahish-e-dunyaa kartaa
dil meN qaaim rahaa ik Khadsha-e-tardeed-e-niyaaz
:tujh se kis tarha maiN izhaar-e-tamannaa kartaa!:
aaj dil meN koii ummeed-o-tamannaa na rahii
shahr-e-barbaad meN kab tak koii Deraa kartaa
umr saarii hii kaTii merii jigar.kaavii meN
koii hotaa jo Gham-e-dil kaa madaavaa kartaa!
jaan de detaa maiN bas ek ishaare pe tire
tuu jo tasdeeq-e-muhabbat kaa taqaazaa kartaa
maiN divaanaa bhii thaa ik qatl kaa shaahid, lekin
kaun thaa jo mirii baatoN pe bharosaa kartaa!
martabe mujh ko bhii mil jaate jahaaN meN :Waseem:
shart ye thii ki maiN eemaan kaa saudaa kartaa !!!
Waseem Ahmed**
very nice bro:flower1: