Kaati hai gham ki raat barhe ehtaraam se
aksar bujha liya hai charagon ko shaam se
roshan hai apni bazm aur iss ehtaraam se
kuch dil bhi jal rahe hain charagon ke naam se
muddat huee hai khoon-e-tamanna kiye magar
ab tak tapak raha hai lahoo dil ke jaam se
subah-e-bahar ham ko bulaati rahi magar
ham khelte rahe kisi zulfon ki shaam se
her saans par hai maut ka pehra laga hua
aahista ay hayaat guzar is maqam se
kaati tamaam umr fareb-e-bahar mein
kaante samet-te rahe phoolon ke naam se
ye aur baat hai ke “Ali” ham na sun sake
awaaz uss ne di hai hamein her maqam se
By: Ali Ahmed Jalili