Jisey nazar churaani hoti hey wo aankh milaata hi kiuN hey!

[Koyal]

Re: Jisey nazar churaani hoti hey wo aankh milaata hi kiuN hey!

@Amal

Jisey nazar churaani hoti hey wo aankh milaata hi kiuN hey!
jisey laot ke jaana hota hey kuch door wo aata hi kiuN hey!

rasmoN ke zalim panjoN sey jisey dar ho toot, bikharney ka
mohabbat ke kheil khilonoN sey wo dil behlaata hi kiuN hey!

murjhaaey huwey sab phooloN sey wehshat si hoti hey jis ko
khizan ke ujrey mosam meiN wo baagh meiN jaata hi kiuN hey!

jisey khatra ho haathoN ki chatri aandhi ko rok na paey gi
wo waqt ki teiz hawaaoN meiN phir deep jalaata hi kiuN hey!

neend sey utthney par aksar jab toot hi jaana hey is ney
har koi phir apni aankhoN meiN ye khaab sajaata hi kiuN hey!

do’raahoN par aa kar aksar simtoN ke masaail hotey heiN
manzil ka pata janey bin bhi koi qadam barrhata hi kiuN hey!

ashqoN sey bheega do’shaala gar pyaar meiN dena hey ik din
to chorr ke jaaney waala phir rootthey ko manaata hi kiuN hey!

yuNhi panchi ishq, mohabbat ke naadaani kartey rehtey heiN
jisey dar toofaan sey lagta hey wo par pheilaata hi kiuN hey!

By: Amal

ap ki har gazal parnay ka maza he kuch aur hota