jis tarah ki haiN ye diivaareiN ye dar jaisa bhi hai
sar chhipaane ko mayassar to hai ghar jaisa bhi hai
us ko mujh se mujh ko us se nisbateiN haiN beshumaar
meri chaahat ka hai mahavar ye nagar jaisa bhi hai
chal paDaa huuN shauq-e-beparvaah ko murshad maan kar
raastaa pur-pech hai yaa pur-Khatar jaisa bhi hai
sab gavaara hai thakan saari dukhan saari chubhan
ek Khushbuu ke liyey hai ye safar jaisa bhi hai
vo to hai maKhsuus ik teri mohabbat ke liyey
tera ‘Anwar’ baa-hunar ya be-hunar jaisa bhi hai