aadaab, dosto!
ek Ghazal haazir-e-Khidmat hai. mulaahiza farmaaiye, aur apnii raae se navaaziye.
**Ghazal
jis shaKhs ko Khudii ne jhaNjhoRaa hai, dosto!
vo jo bhii kar dikhaaye so thoRaa hai, dosto!
us hii pe khul sakaa hai faqat raaz-e-kaainaat
jis ne tilism-e-zaat ko toRaa hai, dosto!
amvaaj-e-dushmanaaN kii bhalaa kyaa bisaat hai
ham ne to ruKh havaaoN kaa moRaa hai, dosto!
ham ne dikhaa diyaa hai ki faulaad kaa hai jism
jab bhii kisii ne haath maroRaa hai, dosto!
insaaN ne qatl-o-jang se paayii hai jab najaat
rishtaa zameeN kaa chaaNd se joRaa hai, dosto!
haathoN pe haath dhar ke jo baiThe rahe sadaa
kahte haiN vo, naseeb nigoRaa hai, dosto!!
samjho ki un kii umr se ik roz ghaT gayaa
kal par jinhoN ne kaam ko chhoRaa hai, dosto!
kyuuN.kar suKhan asar na kare, harf harf meN
:Waseem: ne dil kaa Khuun nichoRaa hai, dosto!!!
Waseem Ahmed**
Re: "jis shaKhs ko Khudii ne jhaNjhoRaa hai"
**jis shaKhs ko Khudii ne jhaNjhoRaa hai, dosto!
vo jo bhii kar dikhaaye so thoRaa hai, dosto!
us hii pe khul sakaa hai faqat raaz-e-kaainaat
jis ne tilism-e-zaat ko toRaa hai, dosto! **
Zabardast Waseem... Very Nice Kafi dinooN baad Amad hui hay and Achi hui hay :D
Re: "jis shaKhs ko Khudii ne jhaNjhoRaa hai"
javaab meN taaKheer kii muaafii chaahtaa huuN. dar-asl aaj kal idhar aanaa kam hii hotaa hai. aap kii daad ke liye mamnuun huuN. shukriya! :)
Re: “jis shaKhs ko Khudii ne jhaNjhoRaa hai”
Sir Gi… Muafii Itni Asani se kahaaN milti hay aajkal… U know.. Everything is Mehngi nowadays 
Waiting for more of Ur Pomes dear… Its always very good to read… :k:
system
5
Re: “jis shaKhs ko Khudii ne jhaNjhoRaa hai”
Another as usual well-balanced masterpiece.. Thank you for sharing 
Re: “jis shaKhs ko Khudii ne jhaNjhoRaa hai”
** ham ne dikhaa diyaa hai ki faulaad kaa hai jism
jab bhii kisii ne haath maroRaa hai, dosto!
good 1 bro :k:
**
ASA
7
Re: “jis shaKhs ko Khudii ne jhaNjhoRaa hai”
wah bouhat achy waseem bhai… :k: zabardast
Re: "jis shaKhs ko Khudii ne jhaNjhoRaa hai"
KhamoshNigahein Jee,D^M Bro and AsSweetAs Bhai izzat.afzaaii ke liye behad mamnuun huuN. meraa dilii shurkiya qubuul keejiye! :)
Amal
9
Re: “jis shaKhs ko Khudii ne jhaNjhoRaa hai”
Bohat khoobsoorat ghazal hey Waseem:k:…thanx for sharing with us. Hope to see more of you