**
Mein sawal likh raha hoon, tum jawab likhna
likhna k wo khat likhtay likhtay tumharay lafzoon mein larzish
keon jhanknay lagi thi
tehreer mein dheeray dheeray sar uthati wo shikastagi kia thi
kaheen kaheen lafz kuch duhlay hoay kuch mittay hoay keon thay
likhna k us shaam tumhari khirkeon par wo dhund kia thi
gehray habs mein bhi palkoon k parday bar bar keon sarsaratay thay
ungleyaan bar bar haath ki angoothi keon ghmati theen
likhna k shaakh pay baythi tanha chirya daykh k tum nay moon keon phayr lia tha
aanchal bar bar zameen par keon latakta tha
subha tumharay takyay pay phayla wo samundar kia tha
likhna k mayaray aangan ki tooti hoe dewar daykh k
tumhari aankhon mein wo jugnoo kia thay
wo chat pay doobtay sooraj say zayr-e-lab kahi baat
kia thi
aur us raat tum jaldi keon so gaee theen
likhna k tum aaj tak kia kuch naheen keh saki ho
likhna k tum aaj tak kia kuch naheen seh saki ho
Mein sawal likh raha hoon, tum jawab likhna
**