*Suno ke raigzaar-e-umer ka yeh aakhri zarra
Meri be-jaan hatheli se phisalta ja raha hai ab
Meri guzari musafat ki thakan ab ood aae hai
Mere qaasid suno janay se pehle itna kehna hai
Mere ujray shehar ke un gali kochoon mein jao tau
Jahaan bachpan bitaaya thaa, jahaan sab kuch ganwaaya thaa
Tau us weeran khandar ko, payaam-e-aakhri dena
Waheen aangan mein dayen hath pe, ek pairr dekhoge
Ussi boorhay shajar ke sin raseeda se badan per tum
Mere be-rang hathon ki lakeeron ki tarah ek jaal dekhoge
Ussi peepal ki chaaoun mein
Kisi masoom ke dil ne kaee sapnay sajaye thay
Kisi ki aankh ke aanso kisi dil ne bahaaye thay
Kisi ki jheel aankhoon ne kaee saagar lutaye thay
Bahut narmi se us peepal ko choo kar itna keh dena
Ke ab aankhoon ke yeh darya kaheen saagar nahe rotay
Muqaddar jinka sota hai kabhi phir woh nahe sotay
Ussay kehna mere qaasid …
Jinhoo ne umer sari teri chaoun mein basar kar di
Woh aakhir pla tumahre paas aa kar kuch na keh paye
Lippat kar tum se ro lenge agar duniya mein reh paaye
Suno qaasid …
Wahan se chand qadam ke faslay per aik chaukhat hai
Wohi chaukhat hai yeh pyare
Jahaan sajday keye hum ne jahan per zindagi haari
Jahaan kuch pal jeye hum ne jahaan per jaan yeh waari
Jawaan margi pe meri shehar yeh maatam kunaa hoga
Magar us aik chaukhat per ajjab sa hi samaan hoga
Wahaan raqsaan sabhi chehron pe kuch ra’aaneyaan hongi
Wahaan bajti chaharon so bahut shehnaeyaan hongi
Wahan jis ki nazar mein jeet janay ki thakawat ho
Magar us dil nasheen chehray pe ghehri muskurahat ho
Samajh lena mere qaasi yehi qaatil mera thehra
Meri aankhain yeh le jao mera yeh kaam kar dena
Ussay ji bhar ke takna tum meri aankhoon mein bhar lena
Ussay chupke se keh dena
Tumhari jeet ki khaatir yeh baazi jis ne haari hai
Nahe tum ho sakay us ke woh mar kar bhi tumhari hai
Nahe … balkay … mere qaasid
Ussay tum kuch nahe kehna …
*