ja kahiyo un se naseem-e-sahar, mera chain gayaa meri neend gayi
tumhen meri na mujh ko tumhaari Khabar, mera chain gayaa meri neend gayi
na haram mein tumhaare yaar pataa na suraaG dair men hai milataa
kahaaN jaa ke dekhuuN main jaauuN kidhar ,mera chain gayaa meri neend gayi
ai baadashaah-e-KhubaaN-e-jahaaN terii mohini surat pe qurbaaN
ki main ne jo terii jabiin pe nazar, mera chain gayaa meri neend gayi
hui bad-e-bahaari chaman men ayaay gul butii mein baaqii rahii na fizaa
merii shaakh-e-umeed na laayi sanvar ,mera chain gayaa meri neend gayi
ai barq-e-tajalli bahar-e-Khudaa na jalaa mujhe hijr mein shammaa saa
merii zist hai misl-e-chiraaG-e-sahar, mera chain gayaa meri neend gayi
kehtaa hai yahi ro ro ke “Zafar”, meri aah-e-rasaa kaa huaa na asar
tere hijr mein maut na aayi magar, mera chain gayaa meri neend gayi
bahadur shah zafar