a litle long…but i liked it so sharing it here..
apney bister par bohat der se mein neem daraz
sochti thi ke woh iss waqt kahan par hoga
mein yahan hun magar uss koocha-e-rang-o-boo mein
roz ki tarhan woh aaj bhi aaya hoga
aur jub uss ne wahan mujhko na paaya hoga ?!
aapko ilm hai woh aaj nahi aayi hein?
meri har dost se uss ne yehi poocha hoga
kiun nahi ayi hein kia baat hui hai aakhir
khud se iss baat pe so baar uljha hoga
kal woh aaey gi tu mein uss se nahi bolun ga
aap hi aap kai baar woh rootha hoga
woh nahi hai tu bulandi ka safar kitna kathin
seerhian charhtey huey uss ne yeh socha hoga
rahdaari mein, harey lawn mein, phoolon ke kareeb
ussne har simt mujhey aan ke dhoonda hoga
naam bhooley se jo mera kahin aaya hoga
gher mehsoos tareeke se woh chonka hoga
eik jumley ko kai baar sunaya hoga
baat kartey huye so baar woh bhoola hoga
woh jo ladki nai ayi hai, kahin woh tu nahi
uss ne har chehra yehi soch kar dekha hoga
jaan-e-mehfil hai magar aaj fakat merey bagheir
haey kis darjey wohi bazm mein tanha hoga
kabhi sannaton se wehshat jo hui hogi usey
usne beysaakhta phir mujhko pukaara hoga
chalte chalte koi manoos si aahat paa kar
doston ko bhi kisi ghadr se roka hoga
yaad kar ke mujhey nam ho gayi hon gi palkein
“aankh mein kuch parr giya” keh keh yeh taala hoga
aur ghabra ke kitabon mein joli hogi panah
har satr mein mera chehra ubhar aya hoga
jub mili hogi usey meri alalat ki khabar
ussne aahista se dewar ko thaama hoga
soch kar yeh, keh behl jaey pareshani-e-dil
yun hi bey wajeh kisi shakhs ko roka hoga!
Itifakann mujhey uss shaam meri dost mili
mein ne poocha ke suno, aaey they woh? kesey they..?
mujhko poocha tha..? mujhey dhoonda tha charon janib..?
..uss ne eik lamhey ko dekha mujhey aur hans di..
uss hansi mein tu woh talkhi thi ke us se aagey
kia kaha uss ne..mujhey yad nahi..lekin
Itna Maloom hai, Khwabon ka bharam Toot gaya ~
–Parveen Shakir
