Islam main ijtamayee maashre ki zaroorat aur ehmiyat
Har shakhs ke liye laazmi hai keh woh khud ko maashre ki zaroorat aur ehmiyat se aashna kare warna log aap apni zindagiyan tabaho barbaad karte rehen ge. zara sochen to sahi keh agar khudaa ne kitaben aur paighambar hi na bheje hote to insaaniyat ka kia haal hota agar paighambarun aur kitabun ke aane ke baad bhi yeh haal hai?
paighambarun ko kia zarorat thi ke woh har aik ke paas jaa jaa kar us ki tawajo maashre ke sudhaarne ki taraf dilaate? isi liye kyunkeh jab tak maashra achha banaane ka logoon main ehsaas peda na kiya jaaye log maashra par koi tawajoh hi nahin dete aur yun maashra kabhi bhi drust ho hi nahin sakta tha. quran main jaga jaga yahee bataaya gayaa hai apne maashre ko aik achha maashra banaao sab mil kar. yahee wajah hai islam aik nazriya hai jis ka bunyaadi maqsad insaniyat ko amno salaamti ki bunyaad par ikatha karna hai
ab aap sochiye maashra drust kaisa ho sakta hai logoon ko aik nazriye par ikatha kiye bagher jo qable amal bhi ho? isi liye logoon ko aise nazriye ki zaroorat hai jo un ke tahafuzati taqaze poore kar sake yani un main namunaasib ikhtilafaat ko khatam kar sake. phir zindagi main aap jo kuchh bhi karna chahte hen us ko maqsad ke tor par lena padta hai aur us ke liye usi darje par mehnat se bhi kaam karna padta hai jisse woh kaam ho jaaye warna maqsad kabhi bhi poora nahin ho sakta na kiya jaa sakta hai. quran main aata hai aamano aur aamiloo saalihaat. is ka yeh matlab nahin hai keh aap namaazen padhen aur roze rakhen bas yeh naiki ho gayee. is ka asal maqsad yahee hai keh maashre ko amno salaamti waala banaane ki koshish karen aur aise kaam karen jin se logoon ki aapas ki nachaaqiyan door Karen jin ki wajah se un main tafreeq peda ho gayee hai. jab ham har tarah ki naachaaqiyan logoon main se door kar den ge to logoon main achhe taluqaat ko phir se bahaali ko moqa mil jaaye ga aur yun un main aapas main bhai chaare ki fazaa peda ho jaaye gi aur dushmani khatam ho jaaye gi. doosre lafzun main amno salaamti ki rah main jo bhi rukawaten hen un ko door karna hai maashre ki islaa main madadgaar saabit ho sakta hai warna hamaara sab kiya dhara reh jaaye ga.
paighambar logoon ko mazhabi wahmo gumaanun aur tohmaat se nikaalne ke liye aate rehe hen ta keh khudaa se taleem haasil karne ke baad doosrun ko taleem den keh woh kaise apni zindagiyan jannat banaa sakte hen aik achha insaani maashra qaayam kar ke. agar maashre ki drustagi ko darmyaan se nikaal den to achhe amaal ka tasawur bajuz tohamaat parasti ke kuchh bhi nahin rehta jis main insaan ki kuchh bhi bhalayee sire se hai hi nahin. yahee wajah hai quran ki roshni main ibaadat is ke siwaa kuchh bhi nahin hai kek log khudaa ke manshooro dastoor aur qanoon ke mutaabiq zindagiyan guzaaren.
aap dekh to rehe hen keh agar manshoor achha na ho yaa dastoor achha na ho yaa qanoon achha na ho yaa un ko theek se samjha na jaaye yaa un ko theek se istemaal na kiya jaaye to insaaniyat kahan tak mutasar hoti hai. yahee wajah hai woh manshooro dastoor quran rad karta hai jo naa-hamwaariyun yani tabqaati taqseem peda karne par mabni hen aur isi liye har woh qanoon quran ko qaable qabool nahin hai jo naa hamwariyun ko taafuz de keh isse insaaniyat ka beda gharq ho jaata hai. issi liye aap ko maashre aur manshooro dastoor aur qanoon ki ehmiyat ko jaanana laazmi hai ta keh aap drust manshooro dastoor aur qanoon ka ehsaas kar saken aur phir us ko istemaal main lane ki koshish kar saken logoon ko samjhaa bujhaa kar. ehtjaaj bekaar hai agar aap ko malom hi nahin aap isse haasil kia karna chahte hen yaa kharaabiyan kahan hen aur yeh sab kon peda kar raha hai aur kyun. Lihaaza apni jahaalat ko door kijiye ilm seekh kar woh ilm jo aap ko zindagi ki mehroomiyun aur zulmo sitam se nijaat de sakne ki ehliyat rakhta ho agar aap us par amal karen.
islam is ke siwaa kuchh bhi nahin hai keh insaaniyat apna woh khudayee raasta paa le jo is ki taraqi aur khushhaal ka zaamin hai hamesha ke liye.
Islam main ITAAT, ITIBAA, TAQLEED aur IJTIHAAD ki zaroorato ehmiyat
1)Lafze itaat ka maada TWAA, WOW aur AIN hai, is ke bunyaadi maani ahamahangi aur itifaaq ke hen, yani kisi baat se itifaaq karna yaa hamkhayaal hona. Misaal ke tor par jo koi islami nazriye ke saath mutafiq ho us ko musalmaan kahen ge. Lafze itaat nazriyaati saath ke liye boola jaata hai yaa nazriye ko qabool kar lene ke liye.
2)Lafze ITIBAA ka maada TAA, BAA aur AIN hai. Is ka bunyaadi maani bhi saath dene yaa saath chalne ke hen. Itaat aur itibaa main farq yeh hai keh aik khayaali saath hai aur doosra amli, yani qadam se qadam milaa kar chalna. Itibaa amli tor par kisi ki madad karna hai kisi maqsad ko haasil karne ke liye.
3)Lafze TAQLEED ka maada QAAF, LAAM aur DAAL hai, is ke bunyaadi maani band yaa patte ke hen jis ke zariye cheezun ko baandh ke rakha jaaye ta keh woh idhar udhar bikhren nahin. jaise paani ko band baandh kar yakjaa rakhna. kisi jaanwar ko gale main rassi baandh kar idhar udhar bhaagne se roke rakhna waghera waghera.
4)Lafze IJTIHAAD ka maada JEEM, HAA aur DAAL hai, jis ka bunyaadi maani koshish karne ke hen maqsad tak pohnchane ke liye.
Islam main in ilfaaz ka istemaal is maqsad ke liye hai keh logoon ko maloom ho sake woh islam ke maqsad ke liye kis tarh amal pera hun takeh woh is maqsad ko paa saken. Islam ka maqsad us waqt tak poora nahin ho sakta jab tak log ikathe nahin hote aur logoon ko ikatha karne ka maqsad yeh hai ke woh mil kar qadam uthaayen islam ke maqsad ko poora karne ke liye. Ab log mil kar tabhi qadam uthaayen ge agar woh kisi baat par itifaaq Karen ge.
Isi liye islam ke maqsad par itifaaq karne waalum ke liye zaroori hai woh taqleed se kaam len aur itibaa Karen quran ka us ke bataaye huwe maqsad par itifaaq karne ke liye.
Isse pehle ke log mil kar koi kaam Karen un ke liye zaroori hai baat ko aik doosre ke saamne rakhen aur aik doosre se is ko achhi tarah se samjhen apni apni soch samajh se kaam le kar phir jis kisi ki bat maqsad ko haasil karne ke liye sab ko bhali lage quran aur haqaaiq ki roshni main us par jatha band ho jaayen aur kaam shuru kar den aur us waqt tak na ruken jab tak kaam mukammal na ho jaaye yani baat apne nateeje par na pohnche. Haan apni poori kaarguzaari par hamesha nazar rakhe rahen ta keh agar kahen se koi ghalti nazar aaye to us ki bar waqt drustagi ki jaa sake.
Itaat ka yeh maani nahin hai keh aap kisi ke hokam ki tameel Karen khwa woh ghalat hi kyun na ho. Isi tarah itibaa ka bhi yeh matlab nahin hai keh aap kisi ka saath dete jaaye chahe woh ghalat simt hi kyun na le jaaye. Yun hi taqleed ka bhi yeh mani nahin hai aap jaa bajaa ikhtilafaat peda karte phiren aur sab aik doosre se monh charaaye idhar udhar bikhar jaayen aur karne waala kaam dhare ka dhara reh jaaye. Yani na bemaqsad andhi itaat darkaar hai kisi se islam ko na andhi itibaa aur na andhi taqleed. Aise log khud ko musalmaan kahen to kahen woh khudaa ke deen ke saath har giz nahin hen balkeh tafarqa daalne waale hen jin ka samjhaane ki zaroorat hai.
Islam ka maqsad wohee poora kar sakta hai jis ko maloom ho islam kia hai aur us ke liye kia karna ho ga aur kaise waghera waghera. Islam ka jahil logoon se koi taluq waasta nahin hai. Is liye jo log saheeh maanu main deen par chalna chahte hen un ko quran ke paighaam ko achhi tarah samajhne ki koshish karni chahiye ta keh woh maqsad ko samjhen aur us ko haasil karne main lag jaayen. tafarqa baazi se qowmne tabaho barbaad ho jaati hen. is ki waja yahee hai log miljul kar kaam karne ke qaabil nahin rehte balkeh aik doosre ki rah main rukawaten ban jaate hen aur yun taraqi yaa to ruk jaati hai yaa us ki raftaar bahot hi kam ho jaati hai.