khud ko kirdar say ojhal nahi honay deta
wo kahani ko mukamal nahi honay deta
sang bhi phenkta rehta he kahin sahal say
aur pani mein bhi halchal nahi honay deta
kaasa-e-khuwab say ta’abeer utha leta he
phir bhi abadi ko jangal nahi honay deta
dhoop mein chaon bhi rakhta he saron par , lekin
aasmaaN par kahin badal nahi honay deta
abar bhi bhejta rehta he sada basti mein
gali kochon mein bhi jal thal nahi honay deta
roz ik lehr uthata lata he be khuwabi ki
aur palkon ko bhi bojhal nahi honay deta
phool he phool khilata he sar-e-shaakh-e-wajod
aur khushbo ko musalsal nahi honay deta
aalm-e-zaat mein darwaish bana deta he
ishq insaan ko pagal nahi honay deta