Is India turning fascist under Modi?

[Southie]

Re: Is India turning fascist under Modi?

@Anjul

Bilkul sahi kaha apne. Bhartiya samacharpatro mein sampradayik sadbavna, bhaichare ki khabre bhi yada-kada chhapti rahti hain, asha karta hun ki pratyek din Bhartiya samacharpatra padhne walon ki drishti un khabro par bhi pade. Mujhe The Hindu padne me hi lagbhag do ghante lag jate hain, kisi din samay mila toh koi Pakistani samacharpatra bhi padhunga, dekhunga waha ki stithi kya hai. Mai samajhta hun ki har achchi-buri khabar par, mudde par sarthak bahas honi chahiye. Chintan karna manushya ki pragati ka sadhan hai. Ninda karna jaroori hai par isase bhi jaroori hai ki hum samasyao ko samjhe, sakaratmak charcha karein, logo me vicharsheelta toh aayegi, yah bhi kam nahi hai. Baharhaal mudde par aate hain, mai samajhta hun ki Bharat fasiwadi nahi ban raha hai, karan kai hain. Bharat ka loktantra bahut majboot hai, yaha sansadiya vidheyak parit hone me vipaksh, sabhi sansadiya dalo ki aham bhoomika hoti hai. Kai baar vidheyak sanrachna me civil society ki bhi bhagidari hoti hai jaise ki Right to information Act 2005. Sarvochch nyaypalika vishwa me kafi pratishthit aur shaktishali hai. kal hi NJAC Act nirast kiya, jo samvidhan ki sarvochchta sidhdh karta hai. Sarkar ka koi bhi kanoon ya kadam agar abhivyakti ki swatantrata par ankush lagane ka prayatn karta hai toh SC use asamvedhanik karaar deta hai jaise ki section 66 A of IT Act. Shayad yahi wajah hai ki Bangladesh ki lekhika Tasleema Nasreen yaha ki nagrikta pane ki maang kar rahi hain. Pakistani gayak Adnan Sami ki yachika vicharaadheen hai, hanlanki unhe anishchitkaal tak rahne ki anumati mili hai. Bharat mai kai dharm hai, kai bhashaye, boliya hai, NGOs, pressure groups ityadi hain par anekta me ekta hai. Jitna bada desh hai utni hi jyada samasyayein bhi hain. Jab bhi kahi koi nindaniya ghatna hoti hai, poora Bharat ekjut hokar virodh karta hai, yahi Bharat ganrajya ki shakti hai varna kai navodit desh bhasha, vikash me pakshpaat, ethnic superiority complex ke karan toot gaye, Bharat ganrajya akhand hai, ek hai. Udaarta mai Bharat ki civil society ka koi saani nahi hai, aatankvadiyo ki faansi ka bhi virodh kiya jata hai, Dadri ghatna par virodh darj karate hue kaiyo ne apne sahitya academy award wapas kar diye. Jab Indira Gandhi sarkar ke samay SC ne ekchhatra raj, fascism, monopoly nahi chalne di aur basic structure doctrine le kar ayi toh Modi sarkar me aisi koi sambhavna nill bate sannata hai. Mere vichar se yaha kai log sahmat nahi honge, ho sakta hai mai Bharat me rahta hun isliye yaha ki paristhitiyo ko adhik samajhta hun. Kuchh ko mere vichar pakshpati lag sakte hain, ye unke vivek par nirbhar karta hai. Mai samajhta hun ki vampanthi (rightist), dakshinpanthi (leftist), udarvadi (liberal), pressure groups, rashtravadi (nationalist) aadi har desh me hote hain aur swasth loktantra ke liye samanjasya jaroori hai.

You had me at ityadi