aadaab dosto!
humare ek bahut kareebi dost hain Ashraf sahab bahut he accha likhte hain un ki ek ghazal paish-e-khidmat hai:
**Ghazal
Ik roge chhupaanay say, kar baiThay jigar zakhmi
Aur aa’nkh milaanay say, kar lii hai nazar zakhmi.
Akhbar kii har surkhi, yuu’n surkh lagay har din
Satro’n kay badan khoonee’n, alfaaz kay sar zakhmi
Tasveer-e-tasawwur peh, kyu’n dhool ki chaadar hai
Yeh soch kay kar baiThay, socho’n ka safar zakhmi.
Is pyaar kay rastay mai’n kaisa hai yeh dorahaa
Tum ho keh udhar zakhmi, hum hai’n keh idhar zakhmi.
Yaaro’n ki judaaie say, behtar hai keh mar jaa’ai’n
Achchaa hai na ho paa’ai’n, phir shaam-o-sahar zakhmi.
Shaitaan kay honay say, shaitaan maza lootai’n
Insaan kay haatho’n say, insaan magar zakhmi.
Hum un ki jafaao’n par, ihsaan to kar jaatay
Dauraan-e-wafadaari, hotay na agar zakhmi.
Hum aisi hakoomat ki, kya khaak karai’n t’areef
Mazdoor jahaa’n naalaa’n, t’aleem-o-hunar zakhmi.
Gaao’n bhi udaas ‘ashraf’, hai’n shehr bhi faryaadi
Har raah dagar giryaa’n, koocha-o-nagar zakhmi.
Ashraf Gill**
