RaatoN ko jaag ke terey leeye hum ashq bahaa kar deikheiN ge
raahoN meiN teri ummeedoN ke hum deeye jalaa kar deikheiN ge
kehtey heiN mohabbat manzil ho to saari umr safar meiN kat’ti hey
hum phir bhi apni aaNkhoN meiN terey khaab sajaa kar deikheiN ge
jo dhool utthey gi rastoN sey terey sang ke aevaz hum seh leiN gey
hum apni nigah ke sarey rang teri raah meiN gaNwa kar deikheiN ge
jo dard miley ga dunya sey hum khushi sey ley kar rakh leiN ge
jo zakham lagey ga rasmoN ka terey naam pe kha kar deikheiN ge
jo rang lagey ga tujh ko bahala us rang meiN khud ko rang leiN ge
hum aaj sey apni har raahat teri khushi meiN paa kar deikheiN ge
hameiN jitni duwaaeiN aati heiN un sab meiN tujh ko maaNgeiN ge
socha hey dil ki har mannat terey naam lagaa kar deikheiN ge
phooloN sey yaari kar deikh phooloN ney bhi hum ko khaar deeye
is baar to socha hey daaman kaaNtoN meiN uljha kar deikheiN ge
hameiN seem-o-zar ke meloN sey teri sooni galyaaN piyaari heiN
hum chorr ke apney mehloN ko terey ghar pe aa kar deikheiN ge
tassavvur ki ujli sochoN ko aqeedat si hey terey naam ke saath
hum apni zaat ke darpan meiN bas tujhi ko laa kar deikheiN ge
chaahey aab miley ya saraab miley ab khaof nahi kisi khatrey sey
is dasht-e-fareb meiN terey leeye hum dhoka kha kar deikheiN ge
chalo maana ke ishq ki baazi meiN harjaana jaan bhi hota hey
hum kuch bhi ho har qeemat par ye juwa lagaa kar deikheiN ge
By: Amal