raat ki zulfeiN marham marham
dard ki lou hai madham madham
mere qissay galiyoN galiyoN
tera charcha aalam aalam
paThar paThar ishq ki raateiN
husn ki baateiN resham resham
aik jiza hai jannat jannat
aik khata hai aadam aadam
aik azaab hai basti basti
aik sada hai matam matam
saari laasheiN Tukre Tukre
saari aankheiN purnam purnam
hijr ke lamhe zakhmi zakhmi
uss ki yaadeiN marham marham
daad talab ejaz asmat
eesaa eesaa, maryam maryam
Mohsin “hum akhbar mein gum haiN”
safah safah, kaalam kaalam