har HasiiN shai meN nazar aaoge, taRpaaoge!...merii ek Ghazal

Arts & Culture Poetry ( Intikhaab & Sho'ra-e-Gupshup)
1

salaam dosto,

kaise mizaaj haiN? ummeed hai k ba_Khair hoNge. :slight_smile:

ek Ghazal pesh-e-Khidmat hai…ummeed hai k pasand aayegii…shukria.

aapkii Hausalah_afzaaii aur aaraa-e-tanqeed o tanqees kaa shiddat se intizaar rahgaa…aapkaa peshgii shukria adaa kartaa huN :slight_smile:

to, Ghazal mulaaHizah/samaa’at farmaaiye:

faqat Khaak_nashiiN.
_______KKF

AUDIO LINK: roop badloge to kia Khud bhii badal jaaoge…merii ek Ghazal by jhumroo on SoundCloud - Create, record and share your sounds for free

**1.
roop badloge to kia Khud bhii badal jaaoge
'umr bhar tark-e-tamannaa kii sazaa paaoge

dil sulagtaa hai to seene se dhuaaN uThtaa hai
aatish-e-'ishq se kis taur amaaN paaoge?

ham judaa ho ke bhii jii leNge, basar kar leNge
tum hii, vai’Hshat_zadah! tanhaaii se ghabraaoge

aa rahii hai mire kaanoN meN bahaaroN kii sadaa
ham_damo! kab gul_bulbul kii Khabar laaoge?

shaam aatii hai to dil Doob ke rah jaataa hai
raat bhar raah dikhaaoge, kahaaN aaoge!

raat baaqii hai abhii, kooch kaa samaan karo
pau phaTe doorii-e-manzil se laraz jaaoge

chaand meN, gul meN, bahaaroN meN, chaman_zaaroN meN
har HasiiN shai meN nazar aaoge, taRpaaoge!

log milte haiN, bichhaRte haiN jahaaN meN har_dam
aaj bichhRoge to kal Hashr meN mil jaaoge!

laakh tafseer kare vai’Hshat-e-dil kii “Sai’hbaa!”
baat itnii hai ki har rang meN yaad aaoge ****:slight_smile: **

2

Re: har HasiiN shai meN nazar aaoge, taRpaaoge!..merii ek Ghazal

**ham judaa ho ke bhii jii leNge, basar kar leNge
tum hii, vai’Hshat_zadah! tanhaaii se ghabraaoge

Nice :k:

Apni to jaise taise, thodi aise ya waise kat jaegi
aap ka kia hoga janab e aali :faizy:
**

3

Re: har HasiiN shai meN nazar aaoge, taRpaaoge!..merii ek Ghazal

hahaha…“kia hogaa?” nahiiN, bal k vo to already ho chukaa! uske pyaar ne murGha banaa diyaa aur vo bhii rouuNaa murGhaa! :smiley: :cb:

4

Re: har HasiiN shai meN nazar aaoge, taRpaaoge!...merii ek Ghazal

rouuNaa bole to?

5

Re: har HasiiN shai meN nazar aaoge, taRpaaoge!...merii ek Ghazal


haN na...jo Khud haNse aur duusre ko rulaave! :(