har aa.ine me.n tiraa hii dhu.aa.n dikhaa.ii diyaa
miraa vajuud hii mujh ko kahaa.n dikhaa.ii diyaa
ye kaisii dhuup ke mausam me.n ghar se niklaa huu.n
ki har parinda mujhe saa.ebaa.n dikhaa.ii diyaa
mai.n apnii lahr me.n lipTaa hu.aa samundar huu.n
mai.n kyaa karuu.n jo tiraa baadbaa.n dikhaa.ii diyaa
kahaa hii thaa ki salaam ai imaam-e-aalii-maqaam
hamaarii pyaas ko aab-e-ravaa.n dikhaa.ii diyaa
mirii nazar to KHalaa.o.n ne baa.ndh rakkhii thii
mujhe zamii.n se kahaa.n aasmaa.n dikhaa.ii diyaa