jis simt bhii dekhun nazar aataa hai ke tum ho
ai jaan-e-jahan ye koii tum saa hai ke tum ho
ye Khvaab hai Khushbuu hai ke jhonkaa hai ke pal hai
ye dhundh hai baadal hai ke saayaa hai ke tum ho
is diid kii sa’at men kaii rang hain larazaaN
mai.n huu.N ke koii aur hai duniyaa hai ke tum ho
dekho ye kisii aur kii aaNkhen hain ke merii
dekhuuN ye kisii aur kaa cheharaa hai ke tum ho
ye umr-e-gurezaaN kahiin Thehre to ye jaanuuN
har saaNs men mujh ko ye lagtaa hai ke tum ho
har bazm men mauzuu-e-suKhan dil zadgaaN kaa
ab kaun hai shiiriin hai ke lailaa hai ke tum ho
ik dard kaa phailaa huaa sehraa hai ke main huuN
ik mauj men aayaa huaa dariya hai ke tum ho
vo vaqt na aaye ke dil-e-zaar bhii soche
is shahar men tanhaa koii ham saa hai ke tum ho
aabaad ham aashuftaa saro.n se nahii.n maqtal
ye rasm abhii shahar me.n zindaa hai ke tum ho
ai jaan-e-‘Faraz’ itanii bhii taufiiq kise thii
ham ko Gam-e-hastii bhii gavaaraa hai ke tum ho