salaam dosto,
aapkii Khidmat meN maiN apnii ek Ghair-muraddaf Ghazal le kar Haazir huaa huuN. ummed
hai k aap pasand farmaayeNge. aapkii aaraa kaa shiddat se intizaar
rahegaa. shukria.
to, Ghazal mulaahizah farmaaiye:
faqat Khaak_nashiiN,
KKF
**
1.
na vo silsile rahe lutf ke, na vo aarzoo-e-karam rahii
magar aaj tak Gham-e-aarzoo se kahiiN panaah nahiiN milii
shab-e-Gham to Khair guzar gaii, mujhe yaad aate rahe vo din
k sha’oor-e-raah na thaa, magar mujhe manziloN kii lagan rahii
na Khirad kii uljhaneN khul sakiiN, na junooN ke falsafe Hal huye
Gham-e-zeest asl-e-sha’oor hai, yehii maut hai yehii zindagii
Gham-e-dil kaho, Gham-e-jaaN kaho, Gham aarzoo-e-jahaaN kaho
yehii justujuu-e-Hayaat hai jise log kahte haiN zindagii
baRii door tak mire naqsh-e-paa mere saath saath chale gaye
jo palaT ke dekhaa to reg_zaar pe miT chuke the nishaan bhii
mere saath dasht-e-talab meN koii na ho sakaa miraa ham_safar
vo jo tez_rau the vo ruk gaye haiN jahaaN bhii chhaaoN ghanii milii
mere ham_safar! tere dil meN bhii kahiiN aarzoo-e-saHar hai kia!
k mirii nazar meN shab-e-siyaah kii teergii nahiiN ajnabii**
