*ghair kyaa jaaniye kyon mujhko buraa kehate hain
aap kehate hain jo aisaa to bajaa kehate hain
vaaqa_i tere is andaaz ko kyaa kehate hain
na vafaa kehate hain jis ko na jafaa kehate hain
ho jinhen shaq vo karen aur khudaaon ki talaash
ham to insaan ko duniyaa kaa khudaa kehate hain
teri soorat nazar aa_i teri soorat se alag
husn ko ahal-e-nazar husn-numaa kehate hain
shikvaa-e-hijr karen kis dil se
ham khud apne ko bhi apne se judaa kehate hain
teri rudaad-e-sitam kaa hai bayaan naa-mumkin
faaydaa kyaa hai magar yoon zaraa kehate hain
log jo kuchh bhi kahen teri sitam-koshi ko
ham to in baaton ko achchhaa na buraa kehate hain
auron kaa tajurbaa jo kuchh ho magar ham to “Firaq”
talkhi-e-zeest ko jeene kaa mazaa kehate hain
~~~~***~~~~
Firaq Gorakhpuri