**garmii-e-hasarat-e-naakaam se jal jaate hain
ham charaagon kii tarah shaam se jal jaate hain **
**bach nikalate hain agar aatish-e-sayyaad se ham
sholaa-e-aatish-e-gulafaam se jal jaate hain
**
**Khudanumaii to nahiin shevaa-e-arabaab-e-vafaa
jin ko jalanaa ho vo aaraaam se jal jaate hain
**
**shamaa jis aag main jalatii hai numaaish ke liye
ham usii aag main gumanaam se jal jaate hain
**
**jab bhii aataa hai meraa naam tere naam ke saath
jaane kiyon log mere naam se jal jaate hain
**rabtaa baaham pe hamen kyaa na kahenge dushman
aashanaa jab tere paigaam se jal jaate hain
(Qateel Shifai)