farz karo hum ahl-e-wafaa hoN, farz karo deewaane hoN
farz karo yeh donoN baateN jhooTi hoN afsaane hoN
farz karo yeh jee ki biptaa, jee se joR sunaaii ho
farz karo abhi aur ho itni, aadhi hum ne chupaaii ho
farz karo tumheiN khush karne ke DhooNDe hum ne bahaane hoN
farz karo yeh nain tumhaare sach much ke mai~khaane hoN
farz karo yeh rog ho jhooTa, jhooTi peet humaari ho
farz karo is peet ke rog meiN saaNs bhi hum per bhaari ho
farz karo yeh jog bijog ka hum ne Dhong rachaaya ho
farz karo bas yehi haqeeqat baaqi sab kuchchh maaya ho
dekh mri jaaN keh gaye “Baahu” - kaun diloN ki jaane ‘hoo’
basti basti sehra sehra, lakhoN kareN diwaane ‘hoo’
jogi bhi jo nagar nagar meiN maare maare phirte heiN
kaasa liye bhabhoot ramaaye sab ke duwaare phirte heiN
shaair bhi jo meeThi baani bol ke man ko harte heiN
banjaare jo ooNche daamoN jee ke saude karte heiN
in meiN sachchhe moti bhi heiN, in meiN kankar patthar bhi
in meiN uthle paani bhi heiN, in meiN gehre saagar bhi
gori dekh ke aage baRhna - sab ka jhooTa sachchha - hoo
Doobne waali Doob gaii woh ghaRa tha jis ka kachchha - hoo
**
ÓßæÑیä ˜ä
**
Back In GupShup