*Kabhi kabhi to yooN lagta he
woh muj sey he bilkol aisey, jaisey pholooN sey khushboo
ya phir maiN us sey hooN, jaisey aankhooN sey aansoo
shayed hum donooN ka hona, in sab cheezooN ka hona he
yeh sab cheezeeN
jin key liye, jab tak hum zinda haiN, hum ko rona he
waqt ik bigrhey bachey sa ziddi he, jis key aagey
hun donooN ka hona eik kheloona he
Jab woh chalta he to mery mann meiN aahat si hoti he
jaisey woh rehber he
maiN chalta hooN to woh mery aagey peechhey yooN chalta he
jaisey meri rah-guzar he
rah-guzar jo khwaabooN key gumnaam zeenooN ko jati he
jaisye aap musaafir he!
Kabhi kabhi to yooN lagta he!
yeh jo hamarey hath haiN in sey behtey darya ruk saktey haiN
paooN meiN itni ta’aqat he
hum dasht-e-fanaa meiN chal saktey haiN
aankhooN meiN manzar haiN aisey jin ko abhi banana he
our rastey haiN jin pe abhi chalna he
our jungal haiN jin meiN dushman makhlooqooN sey larhna he
our kaliyaaN haiN jin ko abhi khilna he
seene meiN khwahish he
khwahish aisa ism-e-aazam he jo sab bhaidooN ki kunji he
jo honey ko anhona he, moti kankar, sadiyooN ko lamha our lamhey ko
sadiyooN jaisa ker sakta he
hontooN meiN woh jadoo he
jo pather meiN phool ugaa sakta he, tarey toorh key la sakta he
jo pyarey hum sey bichharh gaye haiN un ko wapic laa sakta he
jin ko abhi aana he unkey sunder rang dekhaa sakta he
Jitna kochh maiN janta hooN our jis ka muj ko ilm naheen, our woh jo muj sey he
ya meri aankhooN sey oojhal he
our woh jo muj sey pehley tha, our woh jo mustaqbil he
lafz hi in sab razooN ka seena he
jitna kochh maiN karta hoon ya karta tha, ya karney wala hooN
lafz uska takhmeena he
roshni khud soraj he ya soraj ka hissa he(buhat purana qissa he)
aaoo kali raat key daman sey lipteeN our so jaeeN
yehi hamara jeena he!
Taiz hawaa ka pehla jhoonka
apney peechhey, peeley patooN ki lashooN key dhair lagat guzra he
mousm-e-gul ka pehla nughma
charooN janib phool khilata guzra he
pehla badal sard dilooN mein aag lagata guzra he
lekin maiN our woh, jo mera jism he our jis ka maiN sayaa hooN, ya … !
Behunri key banjer mah-o-saal key dhundley aainoon meiN woh ta’abeereeN dhoond rahey haiN
ab tak jin key khwaab hamari aankhooN sey begana haiN
un shehrooN ki yaad meiN gum haiN, azal sey jo werana haiN
kabhi kabhi to yooN lagta he
yeh jo hamarey hath haiN in ko hum bas mil saktey haiN
lahasil ka ghum hi in ki doulat he
dasht-e-fanaa ko dekheeN to ultey phir jaeeN… paooN meiN itni ta’aqat he
aankhooN meiN jaley sey taney haiN, gard-a’alood kheyaloon key, oour roney ki fursat he
khuwahish ki uqaat shaqest-e-khwaab ka zakhm-e-taza he
betarteeb hasti he our tar-e-fanaa sheraza he
lafz-e-sumander ki dehshat he sahil ka khumyaza he
Shaeyd hum donooN key saayee un sab cheezooN key sotey haiN
jin key liye hum jeetey haiN our jin key liye hum rotey haiN*
-A.I.A
