faqiraana aaye sadaa kar chale
miyaaN Khush raho ham duaa kar chale
jo tujh bin na jiine ko kahte the ham
so is ahd ko ab wafaa kar chale
koii naa-ummiidaana karte nigaah
so tum ham se muuNh bhii chhipaa kar chale
bahot aarzuu thii galii kii terii
so yaaN se lahu men nahaa kar chale
dikhaaii diye yuuN ki beKhud kiyaa
hamen aap se bhii judaa kar chale
jabiin sajdaa karte hii karte gaii
haq-e-bandagii ham adaa kar chale
parastish kii yaaN taiin ki ayei but tujhe
nazar men sabon kii Khudaa kar chale
gaii umr dar band-e-fikr-e-Gazal
so is fan ko aisas baDaa kar chale
kahen kyaa jo puuchhe koii ham se “Meer”
jahaaN men tum aaye the, kyaa kar chale