faqiraana aa’e sadaa kar chale
miyaaN KHush raho ham du’a kar chale
jo tujh bin na jeene ko kehte the hum
so is ahd ko ab wafa kar chale
koi na-ummidaana karte nigaah
so tum hum se muNh bhi chhipa kar chale
bahut aarzoo thi gali ki teri
so yaaN se lahu mein nahaa kar chale
dikhAyee diye yooN ki beKHud kiya,
hameN aap se bhi juda kar chale
jabeeN sajda karte hi karte gayi
haq-e-bandagi hum ada kar chale
parastish kee yaaN tak ki ai but tujhe,
nazar mein sabhoN kee KHuda kar chale
gayi umr dar band-e-fikr-e-ghazal
so is fan ko aisa baRhA kar chale
kaheN kya jo poochhe koi hum se “Meer”
jahaaN meiN tum aaye the, kya kar chale…
