ey mohabbat teri qismat keh tujhay muft milay
hum say daanaa jo kamalaat kiya kartay thay
khushk mattii ko emaraat kiya kartay thay
ey mohabbat yeh tera bakht keh bin-mol milay
hum say anmol jo heeron main tula kartay thay
hum say munh zorr jo toofaan utha rakhtay thay
ey meri bhaag bharii, hum teray mujrim tehray
hum jo logon say sawalaat kia kartay thay
hum jo sou baat ki ik baat kiya kartay thay
aur ab teri sakhawat kay ghanay saaye main
khalqat-e-shehar ko hum zinda tamasha tehray
jitnay ilzaam thay maqsooom hamara tehray
ey mohabbat zara andaaz badal lay apna
tujh ko aayenda bhi ushaaq ka khoon peena hai
hum tou mar jayen gay tujh ko tou magar jeena hai
