Us Basti K Ek Koochay Mein. Ek INSHA Naam Ka Deewna -=- Ek Naar Pe Jaan Ko Haar Gaya. Mashoor Hai Us Ka Afsana
Us Naar Mein Aisa Roop Na Tha. Jis Roop Se Din Ki Dhoop Dabay -=- Us Shehar Mein Kia Kia Gori Hai. Mahtab Rukhay Gulnar Labay
Kuch Baat Thi Us Ki Baaton Mein. Kuch Bhaid Thay Us K Chaton Mein -=- Wohi Bhaid Jo Joat Lagatay Hain. Kisi Chahnay Walay K Mann Mein
Usay Apna Bananay Ki Dhun Mein. Huwa Aap Hi Aap Se Begana -=- Us Basti K Ek Koochay Mein. Ek INSHA Naam Ka Deewana
Na Chanchal Khail Jawani K. Na Pyar Ki Ulhar Ghatien Thi -=- Bas Raah Mein Un Ka Milna Tha. Ya Phone Pe Un Ki Baatien Thi
Us Ishq Pe Hum Bhi Hanstay Thay. Be Hasil Sa Be Hasil Tha -=- Ek Roz Biphartay Sagar Mein. Na Kashti Thi Na Sahil Tha
Jo Baat Thi Un K Jee Mein Thi. Jo Bhaid Tha Yaksar Anjana Tha -=- Us Basti K Ek Koochay Mein. Ek INSHA Naam Ka Deewana
Ek Roz Magar Barkha Rut Mein. Woh Bhadon Thi Ya Sawan Tha -=- Deewar Pe Beech Samandar K. Ye Dekhnay Walon Ne Dekha
Mastana Hath Mein Hath Diye. Ye Aik Kagar Par Bethay Thay -=- Yun Shaam Hui Phir Raat Hui. Jab Seelani Ghar Loat Gaye
Kia Raat Woh… Ji Chahta Hai Us Raat Pe Likhein Afsana -=- Us Basti K Ek Koochay Mein. Ek INSHA Naam Ka Deewana
Haan Umr Ka Sath Nibhanay K Thay Ehad Buhat Paiman Buhat -=- Woh Jin Pe Bharosa Karnay Mein Kuch Sood Nahi. Nuqsan Buhat
Woh Naar Ye Keh Kar Door Huwi “Majboori Sajan Majboori” -=- Ye Wehshat Se Ranjoor Huye Or Ranjoori Si Ranjoori
Us Roz Hamein Maloom Hua. Us Shakhs Ka Mushkil Samjhana -=- Us Basti K Ek Koochay Mein. Ek INSHA Naam Ka Deewana
Go Aag Se Chati Jalti Thi. Go Aankh Se Darya Behta Tha -=- Har Aik Se Dukh Nahi Kehta Tha. Chup Rehta Tha Ghum Sehta Tha
Nadan Hain Woh Jo Chairay Hain. Us Aalam Mein Nadano Ko -=- Us Shakhs Se Aik Jawab Mila. Sab Apno Ko Begano Ko
Kuch Or Kaho To Sunta Hon Is Baab Mein Kuch Mat Farmana -=- Us Basti K Ek Koochay Mein. Ek INSHA Naam Ka Deewana
Ab Aagay Ka Tehqeeq Nahi. Go Suntay Ko Hum Sunnay Thay -=- Us Naar Ki Jo Jo Baatien Thi. Us Naar K Jo Jo Qissay Thay
Ek Shaam Jo Us Ko Bulwaya. Kuch Samjhaya Becharay Ne -=- Us Raat Ye Qissa Pak Kia. Kuch Kha Hi Lia Dukhyaray Ne
Kia Baat Hui. Kis Tor Hui. Akhbar Se Log`on Ne Jana -=- Us Basti K Ek Koochay Mein. Ek INSHA Naam Ka Deewana
Har Baat Ki Khoj To Khoj To Theek Nahi. Tum Hum Ko Kehnay Do -=- Us Naar Ka Naam Muqam Hai Kia. Us Baat Pe Parda Rehnay Do
Hum Se Bhi TO Soda Mumkin Hai. Tum Se Bhi Jafa Ho Sakti Hai -=- Ye Apna Bayan Ho Sakta Hai. Ye Apni Katha Ho Sakti Hai
Woh Naar Bhi Aakhir Pachtai. Kis Kaam Ka Aisa Pachtana -=- Us Basti K Ek Koochay Mein. Ek INSHA Naam Ka Deewana
-=EnD=-
(Ibn-e-Insha)