ek Ghazal pesh-e-Khidmat hai:
Haadsaa dekhaa ye pichlii raat meiN
Chaand ghul kar bah gayaa barsaat meiN
Qaid kar paaye na ham hi chaaNdnii
KyuuN kamii DhuuNDhaa kiye zulmaat meiN
Dil mera bin baat jaataa hai bikhar
YuuN kamii kuchh bhi nahiiN haalaat meiN
Raah-e-ulfat meiN hasiiN gulshan bhi the
Kyaa huaa, chhaale mile ifraat meiN
Raah ki dushwaariyaaN mat puuchhiye
Aaiye, kuchh duur chaliye saath meiN
Ab na koii phuul hamko diijiye
Bojh hotaa hai bahut saugaat meiN
Muskuraa detey haiN unko dekh kar
Bas yahii kuchh hai meri auqaat meiN
Har Khushii ka daam ashkoN se diyaa
Kuchh nahiiN mangaa kabhii Khairaat meiN
Jaane kyaa ahl-e-Khirad ko ho gayaa
DhuuNDhtey haiN KhaamiyaaN har baat meiN
Dekh kar insaan ko lagtaa nahiiN
Kuchh farishtey bhi hue is zaat meiN
Falsafey duniya pe haavii ho gaye
Aa gayii lekin kamii jazbaat meiN !!!